Fjárfestingagúru: Seljið dollara og bandarísk bréf

Peter Schiff sem þegar árið 2007 skrifaði bók um hvernig menn gætu hagnast á komandi fjármálakreppu ráðleggur nú öllum að selja dollara og bandarísk ríkisskuldabréf og hlutabréf.

Schiff óttast að bandaríska fjármálakreppan sé rétt að hefjast og að ástandið eigi eftir að versna til muna áður en það batnar. Schiff lét þessi orð falla í umræðuþætti á CNBC stöðinni þar sem rætt var um hættuna á því að Bandaríkin myndu tapa AAA-lánshæfiseinkunn sinni í fyrsta sinn síðan árið 1917.

Schiff telur raunar að Bandaríkin hafi þegar glatað þessu lánstrausti sínu sökum efnahagsþróunarinnar þar í landi undanfarna mánuði. Hann nefnir sem dæmi gífurlega skuldsetningu á ríkissjóð í formi skuldabréfaútgáfu. Sökum þess sé Það aðeins spurning um tíma hvenær dollarinn missi stöðu sín sem helsta gjaldeyrisforðamynt heimsins.

Þegar það gerist muni dollarinn veikjast hratt og mikið sem aftur leiði til þess að allar eignir sem skráðar eru í dollurum muni missa verðgildi sitt.

Schiff er að vísu þekktur fyrir svartsýni á framtíð fjármálalífsins en hann er álitinn gúrú í fjármálaheiminum eftir að hann gaf út bók sína, „Crash Proof: How to Profit From the Coming Economic Collapse" árið 2007. Bókin kom út þegar engan dreymdi um hve illa myndi fara fyrir efnahag heimsins.