Leikjum frestað vegna veðurs

Mörgum leikjum í Englandi og Skotlandi hefur verið frestað í dag vegna kuldakasts í Bretlandi.

Frost er á Bretlandseyjum í dag og því ekki hægt að spila á mörgum völlum í Englandi, Skotlandi og Wales.

Í dag fara fram margir leikir í þriðju umferð ensku bikarkeppninnar. Þegar hefur verið ákveðið að fresta þremur leikjum sem áttu að fara fram í dag.

Það eru viðureignir Birmingham og Wolves, Cheltenham og Doncaster og leik Histon gegn Swansea.

Þá hefur tveimur leikjum verið frestað í ensku C-deildinni og þremur í D-deildinni, sem og fjölmörgum neðrideildarleikjum.