Danskir og norskir ferðamenn streyma til Svíþjóðar

Danskir og norskir ferðamenn streyma nú yfir til Svíþjóðar sem aldri fyrr. Fjármálakreppan og sögulega veikt gengi sænsku krónunnar eru ástæður þessa.

Í frétt um málið í blaðinu Jyllands Posten segir að samkvæmt tölum frá sænsku hagstofunni (SCB) eyða stöðugt fleiri Danir sumarfríum sínum í Svíþjóð. Vinsælast er að dvelja í suðurhluta Svíþjóðar þar sem ferðamannastaðir greina nú frá metumferð fólks frá hinum Norðurlöndunum.

Halland, hérað sem liggur að suðurlandamærum Skánar, var með 4.776 þúsund gistinætur danskra ferðamanna á tímabilinu janúar til apríl í ár og er það 107% aukning frá sama tímabili í fyrra.

Í borginni Jönköping, sem er sú stærsta í norðurhluta Skánar, voru gistinætur Dana tæplega 23.000 talsins sem er 98% auking miðað við sama tímabil í fyrra.

Thomas Brülh, talsmaður Visitsweden segir að fjármálakreppan geri það að verkum að Svíþjóð er orðið svona vinsæll ferðamannastaður hjá Dönum og Norðmönnum. „Sögulega séð ferðast fólk skemmra frá heimilum sínum þegar kreppa ríkir, bæði hvað varðar tíma og vegalengdir," segir Brülh.

Þar fyrir utan hefur gengisfall sænsku krónunnar undanfarna mánuði gert það að verkum að mjög hagstætt er fyrir Dani og Norðmenn að heimsækja landið.

Sænski ferðamannaiðnaðurinn reiknar með því að sumarið í ár slái öll met hvað fjölda norrænna ferðamanna varðar. Svo framarlega sem sænska krónan haldi núverandi gildi sínu eða veikist ennfrekar.