„Sementsverksmiðjan fer ekki fram á neina ríkisstyrki“

„Við erum ekki að fara fram á neina ríkisstyrki eða að ríkið hlaupi undir bagga með okkur, það er alrangt. Að okkar mati þarf hið opinbera að auka framkvæmdir til að liðka fyrir byggingariðnaðinum og atvinnumarkaðinum í heild sinni," segir Gunnar Sigurðsson, framkvæmdastjóri Sementsverksmiðjunnar á Akranesi og bendir á að auðvitað vilji fyrirtækið að íslensk framleiðsla sé notuð í framkvæmdir hins opinbera í stað innflutts sements.

Bjarni Óskar Halldórsson, framkvæmdastjóri Sementsverksmiðjunnar Aalborg Portland á suðurnesjum, sagði í fréttatilkynningu fyrr í dag að hann væri ekki sáttur við að Sementsverksmiðjan á Akranesi krefjist þess að ríkið hlaupi undir bagga með Sementsverksmiðjunni sem nú er í eigu einkaaðila.

Gunnar segir þetta alrangt hjá Bjarna og Sementsverksmiðjan á Akranesi vilji einungis benda á að frekari uppbygging af hálfu hins opinbera sé nauðsynleg.

„Ástæðan fyrir þeim rekstrarvandræðum sem Sementsverksmiðjan stendur frammi fyrir eru einfaldlega þau að stór verkefni eru að klárast og engin ný koma í staðin. Auk þess er byggingariðnaðurinn að engu orðinn sem gerir framleiðslufyrirtæki eins og okkar mjög erfitt fyrir," segir Gunnar.

Gunnar segir að um 40 prósent samdráttur sé á sementsölu hjá fyrirtækinu á milli ára. Hann segir að við minnkandi sölu þá sé ekkert annað í stöðunni en að hægja á framleiðslunni.

„Við höfum stöðvað gjallbræðsluofninn í fjóra mánuði á þessu ári en vanalega er hann stöðvaður einu sinni á ári þar sem hann þarfnast reglubundins viðhalds einu sinni á ári. Þegar framleiðslan er hins vegar eins slæm og raun ber vitni þá framlengir maður þau stopp," segir Gunnar.

Hann segir að erfiðleikar Sementsverksmiðjunnar hafi byrjað þegar bankarnir fóru í þrot síðastliðið haust og um leið hafi sala á sementi dregist saman og sementsframleiðslan minnkað eðli málsins samkvæmt.