Samspil peningastefnunefndar og AGS er umhugsunarefni

Þetta segir í Morgunkorni greiningar Íslandsbanka þar sem fjallað er um fyrsta starfsár nefndarinnar. Þar segir að nefndarmenn segja sjálfir að þeir hlusti á orð sjóðsins sem ráðgefandi aðila.

Hinsvegar virðast flestir telja að ítök sjóðsins í ákvörðunum nefndarinnar séu meiri en það vegna þess valds sem sjóðurinn hefur við uppbyggingu efnahagslífisins og þá áfanga sem hann vill sjá fyrir hverja endurskoðun og lánafyrirgreiðslu á meðan á efnahagsáætlun ríkisstjórnarinnar og sjóðsins stendur.

Nefndinni hefur reynst erfitt á árinu að byggja upp ímynd sjálfstæðis innan þessa fyrirkomulags. Að margra mati hafa þessi tengsl valdið því að nefndin hefur verið á stundum nokkuð óstaðföst og ekki alveg sjálfri sér samkvæm í ákvörðunum sínum frá einum tíma til annars.

Heilt á litið verður samt að segjast að nokkuð hafi áunnist í að ná markmiði peningastjórnunarinnar á árinu. Bæði hefur náðst að stuðla að stöðugu gengi krónunnar og draga úr verðbólgunni. Meðalið hefur hins vegar verið kostnaðarsamt og harkalegt þ.e. gjaldeyrishöft, háir vextir og inngrip á gjaldeyrismarkaði.

Tilgangurinn helgar samt meðalið og við þær aðstæður sem hér eru verður það að teljast viss sigur að hafa náð fram þeim stöðugleika sem hér er kominn á gjaldeyrismarkaði. Þó að gengi krónunnar sé afar lágt er þessi stöðugleiki að skapa kærkomið andrými til að byggja innlent efnahagslíf upp eftir hrun bankanna og gjaldmiðilsins í fyrra.

Verkefni peningastefnunefndarinnar á næsta ári verður að tryggja enn frekar þennan áfanga og draga samhliða úr höftunum og lækka vexti án þess að auka inngripin, að því er segir í Morgunkorninu.