Skilanefnd: Ekki ágreiningur við Jón Ásgeir og Ingibjörgu

Vegna frétta í fjölmiðlum af málefnum Skilanefndar Landsbanka Íslands hf. og Jóns Ásgeirs Jóhannessonar tekur Skilanefndin fram að enginn ágreiningur er til staðar við Jón Ásgeir Jóhannesson og/eða Ingibjörgu Stefaníu Pálmadóttur vegna skuldbindinga þeirra við bankann frá fyrri tíð.

Þetta kemur fram í tilkynningu frá skilanefndinni. Þar segir ennfremur að aðilar hafa á liðnum mánuðum unnið sameiginlega að því að bæta tryggingarstöðu bankans frá því sem var. Veðtaka í Hverfisgötu 8-10 var gerð í þeim tilgangi að tryggja betur endurgreiðslu á lánum þeim tengdum.

„Skilanefndin telur að árangur hafi náðst í að bæta tryggingarstöðu bankans gagnvart fyrrnefndum aðilum," segir Lárentsínus Kristjánsson formaður Skilanefndar Landsbanka Íslands.

„Samkomulag hafi orðið um þetta í árangursríkum viðræðum beggja aðila. Skilanefndin metur nú umræddar skuldbindingar traustari en áður var, sem er jákvætt skref í þá átt að hámarka verðmæti eigna bankans, kröfuhöfum til hagsbóta."