FME sektar Glitni um 4 milljónir vegna Birnuklúðurs

Fjármálaeftirlitið (FME) hefur ákveðið að sekta Glitni banka hf. um 4 milljónir kr. vegna klúðursins í kringum hlutabréfakaup Birnu Einarsdóttur, nú bankastjóra Íslandsbanka, í Glitni árið 2007. Sektin er vegna brota á lögum um verðbréfaviðskipti.

Í umfjöllun um málið á vefsíðu FME segir að þann 29. mars 2007 tilkynnti Glitnir Kauphöll Íslands um hlutabréfakaup Birnu Einarsdóttur í bankanum. Tilkynning var einnig send í samræmi við lög um verðbréfaviðskipti. Um var að ræða kaup á 7.000.000 hlutum á genginu 26,4, samtals 184.8 milljónir kr.

Bankinn hugðist veita lán fyrir kaupunum, gegn veði í bréfunum. Þegar Birna hugðist nýta atkvæðisrétt sinn á aðalfundi 20. febrúar 2008 kom í ljós að hún var ekki eigandi bréfanna. Fyrrnefnt lán var ekki veitt vegna villu í lánasamningi. Þar sem lánið var ekki veitt gátu viðskipti og eignartilfærsla ekki átt sér stað.

Rannsókn Fjármálaeftirlitsins haustið 2008 leiddi í ljós að umrædd viðskipti gengu aldrei í gegn af ástæðum óviðkomandi Birnu og að umræddur kaupsamningur væri niður fallinn.

Fjármálaeftirlitið komst að þeirri niðurstöðu að Glitnir hefði brotið gegn lögum um verðbréfaviðskipti. Þar sem leiðrétt tilkynning var ekki send, þegar mátti vera ljóst að kaup Birnu Einarsdóttur á hlutum í Glitni hefðu ekki átt sér stað.

Samkvæmt lögunum ber útgefanda að tilkynna samdægurs til Fjármálaeftirlitsins þegar fruminnherji á viðskipti með fjármálagerninga útgefandans. Ber útgefanda þegar í stað að senda upplýsingar um viðskipti stjórnenda með hluti í útgefandanum, og aðra fjármálagerninga tengda þeim, til opinberrar birtingar.

Með vísan til alvarleika brots, tímalengdar, þeirrar fjárhæðar sem um var að ræða, stjórnvaldssekta í sambærilegum málum var það mat Fjármálaeftirlitsins að hæfileg sekt væri kr. 4.000.000.