Ferilskrár umsækjenda reyndust gallaðar í 94% tilvika

Sérfræðingar hafa komist að því að 94% þeirra sem sækja um störf eiga á hættu að fá ekki starfið vegna fingurbrjóta í ferilskrám(CV) sínum. Hér er um að ræða atriði eins og ranga stafsetningu, lélegt málfar og uppsetningu á skránum.

Fjallað er um málið á ananova.com og þar segir að dæmi séu um að í ferilskrá hafi staðið setningar eins og ..."meðal áhugamála minna er að matreiða hunda".

Í öðru tilviki er greint frá tilraun til að ganga í augun á atvinnurekandanum með því að segja í ferilskránni: „Ég bar ábyrgð á óánægðum viðskiptavinum."

Bent er á að ef aðeins einn staf vanti í orð geti slíkt komið illa út. Þessa setningu er ekki hægt að þýða með góðu móti en einn skrifaði í ferilskrá sína: "I am a pubic relations officer."

Alls voru 450 ferilskrár kannaðar og í ljós kom að 81% þeirra innihéldu stafsetningar og málfarsvillur og nærri helmingur þeirra var illa upp settur. Aðeins 6% voru lausar við villur. Könnunin var gerð af ráðgjöfum hjá Personal Career Management.

Corinne Mills forstjóri Personal Career Management segir að fjöldinn allur af ferilskrám lenti beint í ruslafötunni því þær eru ekki rétt úr garði gerðar. „Hver vill ráða starfskraft sem getur ekki einu sinni gengið rétt frá ferilskrá sinni," segir Mills.