Steingrímur ánægður með samkomulagið

Kröfuhafar Glitnis munu eignast 95% í Íslandsbanka. Fjármálaráðherra fagnar niðurstöðunni, en kostnaður ríkisins verður um 37 milljörðum króna minni en upphaflega var áætlað.

Þetta er niðurstaða skilanefndar Glitnis eftir ítarlega skoðun, en gamli bankinn mun halda á hlutnum fyrir hönd kröfuhafa. Frestur til að lýsa kröfum í þrotabúið rennur út í lok nóvember og þá mun koma í ljós hverjir eigendur Íslandsbanka eru.

Birna Einarsdóttir, bankastjóri Íslandsbanka, segir samkomulagið treysta samstarf bankans við erlendar fjármálastofnanir. Með þessu lýkur uppgjöri á þeim eignum sem færðar voru frá Glitni til Íslandsbanka við fall bankanna síðastliðið haust. Nú liggur því fyrir hvernig innlent lánasafn Glitnis, þar á meðal íbúðarlán eru metin. Birna segir mismundi eftir lánaflokkum hversu mikið lánið hafi veri lækkuð.

Árni Tómasson, formaður skilanefndar Glitnis, segist ekki geta tjáð sig í smáatriðum um hvernig íbúðalánasafn Íslandsbanka var metið, eða hversu miklum afskriftum var gert ráð fyrir.

„Hinsvegar er hér um ákveðið bráðabirgða mat að ræða. Ef að kröfuhafarnir hefðu valið hina þá leiðina þá hefðu þeir sætt sig við endanlegt mat. Það gerðu þeir ekki. Síðan ræðst það af ástandinu hér heima hvernig til tekst með að endurheimta þessar eignir," segir Árni.

Góð skilaboð út á við

Framlag ríkissjóðs til Íslandsbanka verður mun lægra en upphaflega var áætlað, eða sem nemur 37 milljörðum króna. Ríkið mun þó veita bankanum 25 milljarða króna víkjandi lán. Fjármálaráðherra segir að ríkið fái strax til baka umrædda 37 milljarða.

„Ég tel að þessa sé líka góð útkoma fyrir bankann. Hann leggur af stað vel fjármagnaður og í góðum færum til að sinna sínum mikilvægu verkefnum. Síðast en ekki síst eru þetta líka góð skilaboð út á við. Þetta eru skilaboð um að við erum að endurreisa bankakerfið," segir Steingrímur. Erlendir aðilar séu

með þessu að taka stöðu með íslenska hagkerfinu.

Steingrímur segir að þetta séu jákvæðar fréttir. Samkomulagið komi til með að létta byrðar skattgreiðenda.