Adriano ekki til Tottenham

Umboðsmaður Brasilíumannsins Adriano hefur þvertekið fyrir að hann sé á leið til Tottenham eins og enskir fjölmiðlar hafa gefið í skyn í dag.

Harry Redknapp, stjóri Tottenham, mun hafa áhuga á að fá Adriano til félagsins nú í janúarmánuði en umboðsmaðurinn Gilmar Rinaldi, segir að honum muni ekki verða af ósk sinni.

„Adriano fer ekki til Tottenham - hann verður áfram hjá Inter," sagði hann í samtali við ítalska fjölmiðla. „Jose Mourinho (knattspyrnustjóri Inter) hefur þegar sagt að hann vilji halda honum hjá Inter og því hef ég engu við það að bæta."