Ancelotti til Chelsea með Kaka og Pirlo í töskunni?

The Telegraph heldur því fram í dag að Carlo Ancelotti muni taka við Chelsea í sumar og að hann muni þess utan taka Kaka og Andrea Pirlo með sér frá AC Milan.

Blaðið staðhæfir að Ancelotti hafi þegar skrifað undir samning við Chelsea. Ancelotti hefur margoft verið orðaður við Chelsea síðan hann hitti Roman Abramovich, eiganda Chelsea, síðasta sumar.

Svo virðist sem framtíð Ancelotti hjá Milan sé enn og aftur í lausu lofti þar sem Silvio Berlusconi, forseti félagsins, kenndi honum um að Milan hefði ekki unnið neina titla í ár.

Það er engin nýlunda að Kaka sé orðaður við önnur félög en hann ber þær sögur nánast allaf til baka tafarlaust.