Icesaving hópurinn: Fá fund með sendiherra

Gerard van Vliet, forsvarsmaður Icesaving Association í Hollandi, sem er hópur hlunnfarinna sparifjáreigenda, segir að hann hafi fengið bréf frá forsætisráðuneytinu í gær þar sem hópnum er boðið að hitta sendiherra Íslands gagnvart Hollandi um miðjan þennan mánuð auk þess sem van Vliet mun hitta forsvarsmenn í forsætisráðuneytinu þegar hann kemur hingað til lands í júní. Til stóð að leggja fram kæru hjá EFTA og Evrópusambandinu í gær yrði ekki brugðist við kröfum hópsins.

Hópurinn telur að með þeirri ákvörðun Alþingis, sem mörkuð var með neyðarlögunum 6. Október síðastliðinn, að verja innistæður Íslendinga sé verið að mismuna sparifjáreigendum á grundvelli þjóðernis. Slíkt sé óheimilt samkvæmt EES samningnum. Hópurinn krefst því að Jóhanna vinni að lausn þeirra mála og að stjórnvöld bæti þeim það fé sem tapast hafi umfram það sem hollensk stjórnvöld munu bæta.

En þeir sem áttu Icesave reikninga í Hollandi fá greiddar 100 þúsund evrur frá stjórnvöldum þar í landi. Liðsmenn Icesaving eru hinsvegar þeir sem áttu meira en þetta á reikningum sínum og eins og staðan er í dag eru þeir peningar tapaðir en að sögn Gerards er um að ræða um 200 einstaklinga sem samtals áttu um 25 milljónir evra á Icesave reikningum, eða um 4,2 milljarða íslenskra króna.

Í samtali við Vísi segist van Vliet ætla að hitta sendiherrann og sjá hvaða tillögur hann muni koma með í deilunni. „Okkar markmið er að ná sameiginlegri niðurstöðu í þessu máli," segir hann. Kæra hópsins til Eftirlitsstofnunar EFTA og Evrópusambandsins verður undirbúin eftir sem áður en að sögn Gerards van Vliet verður ákveðið síðar hvenær hún verður lögð fram, það fari eftir viðbrögðum sendiherrans.