West Ham sagt taka tilboði Tottenham

Enska götublaðið Daily Mail heldur því fram í dag að Íslendingafélagið West Ham hafi tekið tilboði Tottenham í Craig Bellamy.

Tilboðið er sagt hljóma upp á tólf milljónir punda og mun Tottenham greiða tíu milljónir strax og afganginn eftir að Bellamy hefur leikinn ákveðinn fjölda leikja fyrir félagið.

Manchester City hefur þrívegis boðið í Bellamy en öllum tilboðunum hefur verið hafnað, nú síðast upp á 9,5 milljónir punda.

Þó er búist við því að City muni jafna boð Tottenham og að Bellamy geti þá valið á milli félaganna tveggja.

Gianfranco Zola, knattspyrnustjóri West Ham, hefur ítrekað verið fullvissaður um að enginn leikmenn verði seldir frá félaginu nema að hann leggi blessun sína yfir það.