Beckham: Þetta snýst ekki um peninga

David Beckham hefur gefið það upp að hann sé tilbúinn að horfa á eftir háum peningaupphæðum gegn því að fá að upplifa drauminn að spila áfram með AC Milan.

Beckham skrifaði á sínum tíma undir 250 milljón dollara samning við LA Galaxy en hefur undanfarið slegið í gegn sem lánsmaður með Milan á Ítalíu.

Enski landsliðsmaðurinn hefur bæði skorað og lagt upp mörk með Milan og var fyrir vikið valinn í Evrópuhóp þess. Allir vilja halda Beckham og hann vill hvergi fara.

"Í augnablikinu er Milan mér mikilvægara en peningar. Fyrst og fremst er ég að hugsa um knattspyrnuna og feril minn. Það er mikilvægt fyrir mig að fá að vera áfram hjá Milan svo ég geti átt möguleika á að spila áfram með enska landsliðinu," sagði Beckham í samtali við Il Corriere Dello Sport á Ítalíu.

Lögmenn Beckham eru nú í Bandaríkjunum þar sem þeir eru í samningaviðræðum við LA Galaxy um að framlengja dvöl Englendingsins á Ítalíu.