Afskrifaði lán til einstaklinga og fyrirtækja um rúm 8%

Íslandsbanki afskrifaði lán til einstaklinga og fyrirtækja um rúm 8% á síðasta ársfjórðungi árið 2008. Alls nam virðisrýrnun útlána um fjörutíu og sjö milljörðum króna.

Íslandsbanki sendi í dag frá sér tilkynningu um afkomu bankans frá 15. október til 31. desember á síðasta ári. Hagnaður bankans eftir skatta nam rúmum 2,3 milljörðum króna. Í afkomutilkynningunni kemur fram að rekstrartekjur bankans, sem hafi að stærstum hluta verið tilkomnar vegna gengishagnaðar, hafi síðan verið að mestu leyti gjaldfærðar sem virðisrýrnun vegna skertrar greiðslugetu lántaka með tekjur í íslenskum krónum en lán í erlendum myntum. Þá hafi reynst nauðsynlegt að afskrifa lán um 47 milljarða vegna þessa.

Afskriftirnar skiptast þannig: bankinn afskrifaði um 1,8 milljarða króna lán til banka, um 15,8 milljarða til einstaklinga, 28,8 milljarða til fyrirtækja og tæpan milljarð til ríkis og sveitarfélaga. Þetta þýðir að bankinn afskrifaði lán til einstaklinga og fyrirtækja um rúm 8% á þessu tímabili.