Íslandsbanki birtir uppgjör fyrstu mánaða eftir hrun

Íslandsbanki birti í dag uppgjör tímabilsins 15. október 2008 til 31. desember 2008, þegar bankinn hét raunar enn Glitnir. Í uppgjörinu kemur fram að hagnaður eftir skatta nam 2,356 milljörðum á tímabilinu og tekjuskattur er áætlaður 364 milljónir. Hreinar vaxtatekjur námu 13,8 milljörðum og hreinar þóknanatekjur 1,6 milljörðum. Stór hluti vaxtatekna á tímabilinu er tilkominn vegna verðtryggðra eigna umfram verðtryggðar skuldir en verðbólga á tímabilinu var 4,83%.

„Hreinar rekstrartekjur námu alls 37,6 ma. kr. Þær eru að stærstum hluta tilkomnar vegna gengishagnaðar sem síðan er að mestu leyti gjaldfærður sem virðisrýrnun vegna skertrar greiðslugetu lántaka með tekjur í íslenskum krónum en lán í erlendum myntum," segir í tilkynningu frá bankanum. „Virðisrýrnun útlána og krafna nam 47 ma. kr. Stærsti hluti hennar er tilkominn vegna ofangreindrar virðisrýrnunar gengistryggðra útlána en veiking krónunnar á tímabilinu hafði afar neikvæð áhrif á greiðslugetu margra lántakenda."

Heildarstærð efnahagsreiknings bankans við síðustu áramót nam 658 milljörðum króna. Arðsemi eigin fjár, fyrir tímabilið, var 17,2% á ársgrundvelli og eiginfjárhlutfall var 10,36% við lok tímabilsins.

Heildarútlán til viðskiptavina og fjármálafyrirtækja námu um 513 milljörðum og innlán námu um 493 milljörðum. Hlutfall heildarinnlána af heildarútlánum var 96% við lok tímabilsins. Eigið fé í árslok nam 68 milljörðum.

Birna Einarsdóttir, bankastjóri Íslandsbanka segir að rekstarniðurstaða bankans endurspegli það ójafnvægi í efnahagsumhverfi hans sem einkenndi tímabilið sem uppgjörið tekur til. „Má þar nefna háa verðbólgu og mikla veikingu krónunnar. Þessir þættir voru mjög afgerandi í rekstrarumhverfi íslenskra fyrirtækja á þessum tíma og áhrifa þeirra gætir töluvert enn. Þessir þættir hafa einnig haft neikvæð áhrif á greiðslugetu einstaklinga og heimila. Ég tel þó jákvætt að staða fjölmargra fyrirtækja í dag er betri en við gerðum ráð fyrir þegar nýi bankinn hóf starfsemi sína fyrir rúmu ári síðan."

Á ársafmæli bankans, þann 15. október s.l., urðu ákveðin straumhvörf í rekstri hans, þegar Glitnir, fyrir hönd kröfuhafa, tók ákvörðun um að eignast 95% hlut í Íslandsbanka. Lausafjár- og eiginfjárstaða Íslandsbanka er traust og rekstrarhorfur góðar þó svo að ennþá sé töluverð óvissa í efnahagsumhverfinu."