Næst stærsta hagkerfi heims að rétta úr kútnum

Útflutningur Japana jókst um 6,3% á öðrum ársfjórðungi frá fyrsta ársfjórðungi þessa árs. Þetta er mesta aukning milli ársfjórðunga síðan á öðrum ársfjórðungi ársins 2002. Japan er næst stærsta hagkerfi heimsins á eftir Bandaríkjunum.

Fjármálakreppa heimsins hefur komið illa niður á Japönum en þeir hafa þurft að þola mestu efnahagsniðursveiflu síðan í lok síðari heimsstyrjaldarinnar. Þetta er í fyrsta skipti í meira en eitt ár sem hagvöxtur eykst milli ársfjórðunga.

Landsframleiðsla Japana jókst um 3,7% frá apríl síðastliðnum og fram til loka júní. Breska blaðið Guardian greinir frá þessu í dag.

Útflutningur jókst um 6,3% frá fyrsta ársfjórðungi en það er fyrsta hækkun milli ársfjórðunga síðan í byrjun síðasta árs og sú mesta síðan á öðrum ársfjórðungi 2002.

Japan er næst stærsta hagkerfi heimsins en í síðustu viku greindi Vísir frá því að landsframleiðsla hafi aukist meira en búist hafði verið við í tveimur stærstu hagkerfum Evrópu, Þýskalandi og Frakklandi.

Eftirspurn eftir bílum og raftækjum, helstu framleiðsluvörum Japana, hefur minnkað gríðarlega síðan fjármálakrísan í heiminum hófst fyrir tæpum tveimur árum en nú er von á því að horfi til betri tíma hjá Japönum.