Nýja Kaupþing: Coca Cola hótaði ekki bankanum

Fram kemur í tilkynningu frá Nýja Kaupþingi að Coca Cola fyrirtækið hótaði ekki bankanum líkt og haldið var fram í Fréttaaukanum í Ríkissjónvarpinu síðastliðið sunnudagskvöld. Það sama sagði Þorsteinn M. Jónsson, stjórnarformaður Vífilfells, í gær.  Auk þess stæði ekki til að afskrifa skuldir sem tengjast fyrirtækinu.

Fram kom í Fréttaaukanum að Coca Cola á Norðurlöndum hefði hótað Nýja Kaupþingi því að svipta Vífilfelli átöppunarleyfi fengi Þorsteinn ekki að halda fyrirtækinu áfram. Í fréttinni kom fram að ársvelta drykkjarvörufyrirtækja Þorsteins á árinu 2007 hafi verið um fimm milljarðar króna en heildarskuldir sem tengjast félögum í eigu Þorsteins námu um 13 milljörðum króna. Þá kom fram að fulltrúi Coca Cola hefði nánast hótað því að ef gengið yrði að veðum í Vífilfelli myndi fyrirtækið verða svipt átöppunarleyfi á flöskum og yrði þannig verðlítið eða nánast verðlaust.

„Vegna villandi umfjöllunar í fjölmiðlum undanfarna daga um meintar hótanir Coca-Cola fyrirtækisins gagnvart Nýja Kaupþingi banka skal tekið fram að engar slíkar hótanir hafa borist bankanum," segir í tilkynningu frá bankanum.