Beckham í Evrópuhóp Milan

Orðrómurinn um að David Beckham muni ganga varanlega í raðir AC Milan varð enn háværari í mörgun þegar spurðist út að enski landsliðsmaðurinn hefði verið tekinn inn í hóp Milan fyrir lokasprettinn í Evrópukeppni félagsliða.

Beckham hefur verið frábær fyrir Milan síðan hann kom þangað sem lánsmaður frá LA Galaxy. Hann skoraði í tveimur leikjum í röð og lagði svo upp tvö mörk fyrir liðið um helgina í 3-0 sigri á Lazio.

Carlo Ancelotti þjálfari Milan segist hafa viljað nýta sér Beckham og gott form hans undanfarið í leikjunum tveimur gegn Werder Bremen dagana 18. og 26. febrúar.

Beckham sjálfur segist taka einn leik fyrir í einu og ætlar að njóta þess í botn á meðan hann er í herbúðum ítalska stórliðsins. Ekkert bendir þó enn til annars en að hann muni snúa aftur til Los Angeles þann 9 mars þegar lánssamningurinn klárast.