Heildarútlán ÍLS jukust um 84 prósent milli mánaða

Alls námu heildarútlán Íbúðalánasjóðs ÍLS) rúmlega 2,9 milljörðum króna í september. Þar af voru rúmir 1,8 milljarðar vegna almennra lána og tæpir 1,1 milljarður vegna leiguíbúðalána. Heildarútlán sjóðsins jukust því um tæp 84% frá fyrra mánuði sem má að mestu rekja til aukningar í leiguíbúðalánum frá fyrri mánuði.

Þetta kemur fram í mánaðarskýrslu ÍLS fyrir september. Þar segir að meðalútlán almennra lána voru um 10 milljónir króna í september sem er um 2% aukning frá fyrri mánuði. Heildarútlán sjóðsins námu rúmum 6,9 milljörðum á þriðja ársfjórðungi sem er um 15% minna en á öðrum ársfjórðungi og um 35% minna en á fyrsta ársfjórðungi þessa árs.

Heildarútlán sjóðsins nema því rúmum 24,4 milljörðum það sem af er árinu 2009 en það eru um 51% minni útlán en á sama tímabili árið 2008.

Á þriðja ársfjórðungi bárust 658 umsóknir vegna greiðsluerfiðleika sem er um 35% færri umsóknir en á öðrum ársfjórðungi. Á fyrstu níu mánuðum ársins hafa því borist 2485 umsóknir sem eru 539% fleiri umsóknir en á sama tímabili ársins 2008.

Úrræði vegna greiðsluvanda eru samningar, skuldbreyting vanskila, frestun á greiðslum, lenging lána og greiðslujöfnun. Frá því sjóðurinn fór að bjóða upp á greiðslujöfnun fasteignaveðlána hafa verið afgreiddar 506

umsóknir.

Heildarvelta íbúðabréfa í september nam tæpum 83 milljörðum sem er 17% minni velta en í fyrra mánuði. Heildarvelta bréfanna nemur rúmum 712 milljörðum það sem af er árinu 2009. Ávöxtunarkrafa Íbúðabréfa lækkaði nokkuð í september eða um 15 til 24 punkta eftir flokkum.

Greiðslur Íbúðalánasjóðs námu um 6,6 milljörðum króna í september og voru afborganir íbúðabréfa stærsti hluti þeirra. Uppgreiðslur lána Íbúðalánasjóðs í september námu um 875 milljónum króna. Heildaruppgreiðslur allra lána Íbúðalánasjóðs eru því um 6,5 milljarðar króna sem af er árinu 2009.