Launakostnaður jókst á fyrri helming ársins

Heildarlaunakostnaður á greidda stund jókst um 3,5% frá fyrsta til annars ársfjórðungs í atvinnugreininni samgöngum og flutningum, um 2,6% í verslun og ýmissi viðgerðarþjónustu og um 2,5% í iðnaði. Á sama tímabili dróst heildarlaunakostnaður á greidda stund saman um 3,5% í byggingarstarfsemi og mannvirkjagerð.

Þetta kemur fram á vefsíðu Hagstofunnar. Þar segir að heildarlaunakostnaður án óreglulegra greiðslna jókst um 1,3% frá fyrri ársfjórðungi í atvinnugreininni samgöngum og flutningum og um 0,8% í verslun og ýmissi viðgerðarþjónustu.

Á sama tímabili dróst heildarlaunakostnaður án óreglulegra greiðslna saman í iðnaði um 0,2% og í byggingarstarfsemi og mannvirkjagerð um 4,3%. Við útreikning á Í heildarlaunakostnaði án óreglulegra greiðslna er ekki tekið tillit til greiðslna sem ekki eru gerðar upp á hverju útborgunartímabili svo sem orlofsuppbótar.

Aukning heildarlaunakostnaðar á greidda stund frá 2. ársfjórðungi 2008 var á bilinu 1,9% til 8,7%, mest í byggingarstarfsemi og mannvirkjagerð og minnst í verslun og ýmissi viðgerðarþjónustu.