Mastercard lækkar gjöld til banka um helming

Mastercard í Evrópu hefur ákveðið að lækka tímabundið millikortagjöld banka innan Evrópusambandsins um helming. Þar sem Ísland tilheyrir Evrópukerfi Mastercard nær þessi ákvörðun einnig til Íslands.

Haukur Oddsson forstjóri Borgun hf. segir að framangreind ákvörðun gildi um viðskipti milli landa innan ESB, það er hvað Ísland varðar viðskipti til og frá löndum í ESB. Ákvörðun nær ekki til viðskipta innan Íslands né annarra alþjóðaviðskipta.

Þessi gjöld eru ekki há prósenta eða 0,2% til 0,4% eftir því um hvort um debit eða kreditkort er að ræða en það eru korthafarnir sem á endanum hafa borgað þessi gjöld og það munar um allt í kreppunni.

Töluverðar deildur hafa verið um þessi gjöld milli Mastercard og Framkvæmdanefndar ESB undanfarna mánuði en ESB hefur viljað slá þessi gjöld alfarið út af kortinu.

Í frétt um málið í breska blaðinu Independent segir að breskir verslunareigendur séu ánægðir með fyrrgreint samkomulag og telja að það muni spara breskum neytendum um 15 milljónir punda á ári eða um 2,6 milljarða kr.