Landsbankinn vísar ásökunum Sparnaðar á bug

Landsbankinn segir það alrangt að verið sé að hvetja sparendur til að segja upp viðbótarlífeyrissparnaði hjá Bayern Líf eins og forsvarsmaður Sparnaðar ehf. fullyrti í gær í samtali við fréttastofu. Ingólfur Ingólfsson sagði þá að að sér hafi borist í hendur skjöl og vitneskja um að Nýi Landsbankinn beiti gróflegum rangfærslum og fölsun á gögnum í þeim tilgangi að ná til sín langtímasparnaði viðskiptavina Bayern Líf, sem er umboðsaðili þýsku tryggingarsamsteypunnar Versicherungs Kammer Bayern á Norðurlöndum.

Af þessum sökum hafi Sparnaður sent kvörtun til Neytendastofu vegna ólögmætra viðskiptahátta Nýja Landsbankans. „Þetta er þeim mun alvarlegri blekkingar hjá Nýja Landsbankanum þegar haft er í huga að þeir eru að hvetja sparendur til þess að segja upp viðbótarlífeyrissparnaði hjá Bayern Líf," sagði Ingólfur einnig.

Rangt að hvatt sé til uppsagnar

Þetta segir Landsbankinn að sé rangt. „Ekki er rétt að Landsbankinn hvetji til uppsagnar viðbótarlífeyrissparnaðar hjá Bayern Líf sem selt er af Sparnaði ehf. Hið rétta er að margir viðskiptavinir Landsbankans hafa hætt við að færa lífeyrissparnað sinn úr Landsbankanum yfir í Bayern Líf en hart hefur verið sótt að þeim af hálfu sölumanna Bayern Líf að undanförnu," segir í yfirlýsingu frá bankanum. „Staðan hefur því verið sú að það er Bayern Líf sem hefur hvatt viðskiptavini Landsbankans til að segja upp viðbótarlífeyrissparnaði hjá Landsbankanum en ekki öfugt líkt og Bayern Líf heldur fram. Eftir að hafa fengið nánari kynningu á lífeyrissparnaðarleiðum, kostum ólíkra leiða og kostnaði sem þeim fylgir, hafa margir viðskiptavinir hætt við flutning til Bayern Líf og haldið áfram viðbótarlífeyrissparnaði hjá Landsbankanum."

Ummæli um rangfærslur og blekkingar alröng

Þá segir einnig að Landsbankinn bendi viðskiptavinum sínum á ýmsar leiðir í lífeyrissparnaði, „þar á meðal verðtryggða og óverðtryggða innlánsreikninga og leggur áherslu á langtímasparnað. Ekki er lögð áhersla á eitt sparnaðarform umfram annað heldur er það val hvers og eins og viðskiptavinum jafnframt bent á þann kost að flytja sig milli ólíkra sparnaðarleiða innan bankans. Ummæli um að beitt sé rangfærslum eða blekkingum til að ná í lífeyrissparnað fólk eru alröng."

„Samkeppni um lífeyrissparnað og aukið framboð af sparnaðarleiðum er af hinu góða fyrir neytendur. Í þeirri samkeppni mun Landsbankinn leggja áherslu á góða þjónustu og fræðslu um lífeyrissparnað," segir ennfremur.