Banaslys á Grindavíkurvegi

Karlmaður á fimmtugsaldri lést í bílslysi á Grindavíkurvegi á sjöunda tímanum í morgun. Talið er að hann hafi látist samstundis.

Annar maður var fluttur með sjúkrabíl á Slysadeild og dvelur enn á Landsspítalanum.Hann mun þó ekki vera í lífshættu. Slysið varð þegar lítill sendibíll og jeppi, sem komu úr gagnstæðum áttum, rákust á. Nánar er ekki vitað um tildrög því ekki er búið að ræða við ökumanninn, sem komst af, og mennirnir voru einir í bílunum.

Veginum var þegar lokað en um klukkan tíu var farið að hleypa umferð framhjá slysstaðnum. Áður en það kom til þurfti að aka út á Reykjanesið til að komast til og frá Grindavík. Rannsóknanefnd umferðarslysa og lögreglan á Suðurnesjum rannsaka málið.

Þetta er sjöunda banaslysið í umferðinni það sem af er árinu og þau voru líka orðin sjö á sama tíma í fyrra.-