Stjórnendur SPRON hafna fullyrðingum seðlabankastjóra

Fyrrverandi forstjóri og stjórn SPRON hafna því algerlega að eigið fé SPRON hafi verið uppurið um páskana á síðasta ári eins og seðlabankastjóri hélt fram í Markaðnum á Stöð 2 í gær. Þá hafna fyrrverandi stjórnendur SPRON jafnframt fullyrðingum fjármálaráðherra um að eigið fé SPRON hafi farið niður fyrir 8% á fyrsta ársfjórðungi 2008.

„Samkvæmt árshlutareikningi sparisjóðsins þann 31. 3. 2008 nam eigið fé SPRON 17,8 milljörðum króna og var eiginfjárhlutfallið 14,1%. Stjórn SPRON harmar að opinberir aðilar þurfi að grípa til rangfærslna til þess að réttlæta gjörðir sínar. Það var öllum ljóst að staða SPRON var erfið og hefur verið um nokkurn tíma. Það er hins vegar jafnljóst að lausn var í sjónmáli sem hefði tryggt rekstrargrundvöll sparisjóðsins," segja fyrrverandi stjórnendur SPRON í yfirlýsingu til fjölmiðla.

Fyrrverandi stjórnendur SPRON segja jafnframt að ef stjórnvöld hefðu veitt sparisjóðnum sambærilega fyrirgreiðslu og þeir veittu öðrum fjármálafyrirtækjum þá væri staða SPRON og starfsmanna ekki sú sem hún er í dag.