Hlutabréf í Carnegie hafa fimmfaldast í verði

Hlutabréf í sænska bankanum Carnegie fimmfölduðust í verði yfir áramótin. Við lok markaðarins á föstudag voru hlutirnir seldir á 1,25 kr. sænskar en fyrir áramót er HQ Direct hóf viðskipti með hlutina utanmarkaðar þann 29. desember var verð þeirra 25 aurar sænskir.

Milestone á 10% hlut í Carnegie en sænska ríkið yfirtók móðurfélag bankans í nóvember s.l.. Carnegie var síðan afskráð í sænsku kauphöllinni. Síðasta skráða verð á hlut í Carnegie í nóvember var tæpar 18 kr. sænskar.

HQ Direct var áður Glitnir AB í Svíþjóð og tók að sér að sjá um viðskiptin með hluti í Carnegie skömmu fyrir áramótin. Samkvæmt frétt á Dagens Industri telja fjárfestar að eftir einhverju sé að slægjast í bankanum miðað við þessa hækkun á hlutunum. HQ Direct tekur 5 aura fyrir sölu á hverjum hlut.

Markaðsvirði Carnegie er samkvæmt þessum tölum 89 milljónir sænskra kr. eða sem svarar til um 1,3 milljarða kr..

Í nóvember, áður en viðskiptin með hlutina voru stöðvuð í kjölfar yfirtöku sænska ríkisins var markaðsvirðið hinsvegar 1,3 milljarður sænskra kr. eða tæplega 18 milljarðar kr..