Mrs Moneypenny vongóð um innstæðu sína hjá Kaupþingi

Mrs Moneypenny, ein af þekktari dálkahöfundum Financial Times er vongóð um að fá borgaða innistæðu sem hún brann inni með hjá Singer & Friedlander bankanum í London þegar Kaupþing varð gjaldþrota í haust.

Mrs Moneypenny ræðir um málið í vikulegum pistli sínum í Financial Times um helgina undir fyrirsögninni "Þetta er árið sem við lifum varlega".

Það verður eitt af krefjandi verkefnum ársins fyrir Mrs Moneypenny að ná innistæðunni til baka. Fjárhæðin var borguð fyrir mistök inn á reikning í Singer & Friedlander aðeins nokkrum dögum áður en bankinn fór í þrot. Reikningurinn var á nafni fyrirtækis sem Mrs Moneypenny á í London.

Fyrstu tilraunir til að ná peningunum til baka báru ekki árangur, en upphæðin er rétt tæplega 50.000 pund eða um níu milljónir kr.. Fékk Moneypenny og fjölskylda hennar að vita í fyrstu að upphæðin væri ekki tryggð af breskum yfirvöldum.

"Hinsvegar er ekki allt glatað," skrifar frúin sem nefnir að nú séu tímar björgunaraðgerða á vegum stjórnvalda og því nái innistæðan yfir það loforð breskra stjórnvalda að allar innistæður í bönkum séu tryggðar upp að 50.000 pundum.

Hún hefur því lagt fram kröfu og er vongóð um að fá hana greidda.

Mrs Moneypenny er fyrrum fjárfestir með háskólagráður frá bæði London Business School og Háskólanum í Hong Kong. Hún hefur skrifað reglulega pistla um fjármál í Financial Times frá árinu 1999. Þar að auki hefur hún skrifað tvær bækur, Mrs Moneypenny: Survival in the City (2003) og Mrs Moneypenny: Email from Tokyo, (2006).