Amauri: Spila bara fyrir Brasilíu

Sóknarmaðurinn Amauri hjá Juventus hefur gefið það út að hann muni ekki klæðast ítalska landsliðsbúningnum og bíður eftir því að fá tækifæri með landsliði Brasilíu.

Amauri er fæddur í Brasilíu en fær brátt ítalskan ríkisborgararétt. Hann hefur enn ekki leikið fyrir Brasilíu og var Marcello Lippi að vonast til að geta fengið Amauri til að spila fyrir ítalska landsliðið.

Amauri fékk símtal fá Carlos Dunga, þjálfara Brasilíu, í síðustu viku og ætlaði hann að kalla leikmanninn upp í hóp sinn. Juventus ákvað þó ekki að sleppa Amauri þar sem kallið kom of seint.

„Ég ætla að halda áfram að leggja mig fram og vonast til að Dunga láti í sér heyra aftur," sagði Amauri.