Líkti Fjármáleftirlitinu við engla

Valgerður Sverrisdóttir, þáverandi viðskiptaráðherra, líkti Fjármálaeftirlitinu við engla í ávarpi sem hún flutti á ráðstefnu eftirlitsins í janúar árið 2005. Á sömu ráðstefnu sagði Sigurður Einarsson, þáverandi stjórnarformaður Kaupþings, eftirlitsaðila með fjármálastarfsemi hér á landi vera jafn kraftmikla og eftirlitsstofnanir í Lúxemborg.

Aðalræðumaður ráðstefnunnar var Sir Howard Davies, fyrrverandi forstjóri breska fjármálaeftirlitsins. Meðal annarra ræðumanna voru Halldór J. Kristjánsson og Bjarni Ármannsson.

„Rétt fyrir jól fékk ég sent fallegt jólakort frá Fjármálaeftirlitinu. Á kortinu var mynd af englum fönguðu athygli mína," sagði Valgerður sem túlkaði myndina á þá vegu að englarnir kæmu með frið á jörð með sér. Á myndinni var einnig leiðarstjarna.

„Rétt eins og englarnir vaka yfir okkur og tryggja velferð okkar vakir Fjármálaeftirlitið yfir fjármálakerfinu," sagði ráðherrann.

Í ræðu sinni kvaðst Sigurður vera ánægður með samskiptin við Fjármálaeftirlitið hér á landi. Á Íslandi, líkt í Lúxemborg, væri hægt að tjónka við eftirlitinu og fá leiðsögn þar sem lögð væri áhersla á aðalatriði umfram formsatriði. Þannig yrði traust og trúnaður til í viðskiptum.

Hægt er að lesa ræðu Valgerðar hér og ræðu Sigurðar hér.