MP Banki með mesta veltu á skuldabréfamarkaði

MP Banki var með mesta veltu á skuldabréfamarkaði í Kauphöll Íslands fyrstu sjö mánuði ársins, samkvæmt upplýsingum frá Nasdaq OMXI.

Velta bankans nam 846 milljörðum króna sem er 28,6% af allri veltu skuldabréfa í Kauphöllinni á þessum tíma .

Heildarvelta á skuldabréfamarkaði fyrstu sjö mánuði ársins nam tæplega 3.000 milljörðum króna og hefur áhugi fjárfesta á skuldabréfum aukist mikið síðustu mánuði. Þessi velta miðast við veltu hjá kaupendum og seljendum þannig að umrædd 3.000 milljarða króna velta er í rauninni tvöföld heildarvelta á skuldabréfamarkaði.

Þess má geta að viðskipti í Kauphöll Íslands samanstanda nú nær eingöngu af viðskiptum með skuldabréf. Viðskiptin eru í markflokkum ríkisbréfa, verðtryggðum bréfum útgefnum af Íbúðalánasjóði og óverðtryggðum bréfum útgefnum af Lánasýslu ríkisins.