Lengsta taphrina Phoenix í fjögur ár loksins á enda

Steve Nash og félagar í Phoenix Suns unnu í nótt langþráðan sigur í NBA-deildinni í körfubolta þegar liðið vann Oklahoma City 106-95. Phoenix-liðið var búið að tapa sex leikjum í röð sem er lengsta taphrina liðsins í fjögur ár.

Leandro Barbosa skoraði 11 af 22 stigum sínum síðustu sex og hálfu mínútu leiksins og Steve Nash var með 18 stig og 8 fráköst. Shaquille O'Neal var aðeins með 1 stig og 1 fráköst í fyrri hálfleik en endaði með 12 stig og 4 fráköst.

„Við áttum ekki góðan leik en við fundum leið til þess að vinna leikinn í fjórða leikhlutanum og það er eitthvað sem hefur vantað hjá okkur síðustu tvær vikurnar," sagði Steve Nash eftir leikinn.

Ben Gordon skoraði 27 stig og John Salmons bætti við 24 stigum í 97-79 sigri Chicago Bulls á New Orleans Hornets. Bulls liðið náði bæði að skora 18 stig og 17 stig í röð á mismundandi tímum í leiknum. Chris Paul var með 29 stig fyrir Hornets sem töpuðu aðeins í annað sinn í síðustu ellefu leikjum.

Tony Parker var með 28 stig og Tim Duncan bætti við 15 stigum og 12 fráköstum í naumun 88-85 sigri San Antonio Spurs á Houston Rockets. Ron Artest skoraði 21 stig fyrir Houston og Yao Ming var með 18 stig og 11 frákst. Houston tapaði þarna öðrum heimaleik sínum í röð en hafði á undan unnið 12 leiki í röð á heimavelli sínum.

Minnesota Timberwolves vann 108-100 sigur á Charlotte Bobcats þar sem nýliðinn Kevin Love var með 22 stig fyrir Minnesota. Rodney Carney og Ryan Gomes voru skammt undan með 21 stig hvor. Gerald Wallace var með 26 stig fyrir Charlotte.

Renaldo Balkman er að spila vel með Denver þessa daganna og var með 22 stig og 11 fráköst í 107-94 sigri liðsins á Los Angeles Clippers. Nene var með 17 stig og 10 fráköst og saman voru þeir félagar því með 39 stig og 21 frákast á móti Marcus Camby sem snéri þarna aftur til Denver. Camby var með 11 stig og 11 fráköst í leiknum.