NBA í nótt: Aftur tapaði Cleveland á heimavelli

Chicago vann í nótt afar nauman sigur á Cleveland, 86-85, á útivelli er tveir leikir fóru fram í NBA-deildinni í körfubolta í nótt.

Þá vann Utah góðan sigur á San Antonio á heimavelli, 113-99.

Cleveland tapaði ekki leik á heimavelli framan af tímabili í fyrra en hafa nú þegar tapað tveimur leikjum þar. Cleveland tapaði fyrir Boston á fyrsta keppnisdegi tímabilsins og nú fyrir ungu liði Chicago.

Þetta var mikill baráttusigur hjá Chicago en enginn í liðinu átti sannkallaðan stjörnuleik. Liðið tók meira að segja færri heildarfráköst en Cleveland (49-43).

Leikmenn Chicago börðust hins vegar fram í rauðan dauðann. LeBron James átti til að mynda möguleika á að tryggja Cleveland sigurinn í blálokin en Joakim Noah náði að trufla James sem hitti ekki.

Luol Deng var stigahæstur hjá Chicago með fimmtán stig en John Salmons og Derrick Rose voru með fjórtán stig hvor.

Hjá Cleveland var James stigahæstur með 25 stig. Næstur kom Shaquille O'Neal með fjórtán stig og tíu fráköst. Anderson Varejao skoraði tólf stig og tók þrettán fráköst.

Utah vann mikilvægan sigur á San Antonio eftir að liðið tapaði fyrir Houston og Dallas fyrr í vikunni. Liðið hafði tapað þremur af fyrstu fjórum leikjum sínum fyrir leikinn í nótt.

Carlos Boozer og Deron Williams náðu sér vel á strik og skoruðu 27 stig hvor gegn einu besta varnarliði deildarinnar. Alls skoraði Utah 113 stig í leiknum þó svo að liðið hafi aðeins sett niður einn þrist í öllum leiknum.

Alls hafði Utah tapað fjórum leikjum í röð fyrir San Antonio og 29 af síðustu 35 leikjum sínum við félagið. Utah hafði ekki skorað meira en 100 stig gegn San Antonio í síðustu 40 deildarleikjum liðanna.

Boozer hefur verið nokkuð gagnrýndur fyrir frammistöðu sína í haust en hann skilaði flottum tölum í nótt og tók til að mynda fjórtán fráköst.

Hjá San Antonio var Tony Parker stigahæstur með 21 stig. Tim Duncan var með fimmtán stig og þrettán fráköst og þeir Richard Jefferson og Dejuan Blair með fjórtán hvor.