Sérstakur saksóknari: Kaupþingsmál nýtur ekki forgangs

Ólafur Þór Hauksson, sérstakur saksóknari bankahrunsins, segir í samtali við Vísi að mál vegna lána sem fyrrum stjórn gamla Kaupþings veitti lykilstarfsmönnum bankans sé í ákveðnum farvegi eins og fjöldamörg mál um þessar mundir. Það mál njóti hins vegar ekki sérstaks forgangs fram yfir önnur mál. Hann segir þó að öll mál séu athuguð gaumgæfilega og mál er snerta fjárhagslega hagsmuni séu vissulega ákveðin forgangsmál út frá rannsóknarlegu sjónarmiði.

„Það er engin leið að segja til um það hvenær rannsókninni lýkur en ég vonast til að henni ljúki sem fyrst. Það sem snýr að okkur í þessu máli er eingöngu að athuga hvort sú aðgerð fyrrum stjórnar bankans, að fella níður lán starfsmannanna, sé refsiverð," segir Ólafur Þór.

Ólafur segir að það lýti kannski út fyrir að starfsmenn embættisins sitji aðgerðalausir en málið er það að við getum ekki upplýst fjölmiðla og almenning um alla þá hluti sem hér fara fram, slík upplýsingagjöf getur laskað rannsóknarhagsmunum.

Aðspurður um hvort embættið hafi bolmagn og burði til að komast til botns í öllum þeim málum sem embættið stendur frammi fyrir segir Ólafur:

„Í embættið verður að velja starfsmenn af kostgæfni sökum umfangs og mikilvægis þeirra mála sem hér liggja á borðinu", vildi hann auk þess koma því á framfæri að embættið hefur bætt við sig starfsmönnum að undanförnu og eru starfsmenn embættisins nú tólf talsins, en voru fimm við stofnun þess í byrjun febrúar á þessu ári.