Kaupþing afskrifar ekki lán starfsmanna

Stjórn Nýja Kaupþings banka ætlar ekki að afskrifa lán til starfsmanna vegna hlutabréfakaupa á meðan kæra hluthafa vegna lánanna er til meðferðar hjá sérstökum saksóknara.

Lánin eru enn á bókum bankans og hafa ekki verið afskrifuð. Samkvæmt álitum tveggja utanaðkomandi lögfræðinga hefur stjórn Nýja Kaupþings banka ekki lagaheimildir til að rifta þeirri ákvörðun stjórnar gamla Kaupþings að fella niður persónulegar ábyrgðir starfsmanna á lánum vegna hlutabréfakaupa.

Forsaga málsins er sú að stjórn gamla Kaupþings ákvað þann 25. september 2008 að fella niður persónulegar ábyrgðir starfsmanna bankans vegna lána til hlutabréfakaupa.

Samtals náði þessi niðurfelling til persónulegra ábyrgða að upphæð tæpum 10,5 milljörðum króna. Tæpur helmingur þeirrar niðurfellingar eða um 4,9 milljarðar króna var niðurfelling á persónulegum ábyrgðum sjö þáverandi æðstu stjórnenda bankans.

Lánin nema í heild 47,3 milljörðum króna til 130 starfsmanna. Meirihluti lánanna var til einstaklinga en hluti þeirra var til eignarhaldsfélaga í eigu starfsmanna.

Hluti lánanna var tryggður með persónulegum ábyrgðum, en stærstur hluti þeirra var eingöngu tryggður með veði í sjálfum hlutabréfunum.

Þetta segir í yfirlýsingu frá stjórn Nýja Kaupþings.