Framleiðsla á evrusvæðinu eykst um 0,5% milli mánaða

Framleiðsla á evrusvæðinu jókst um 0,5% í maí. Þetta er í fyrsta skiptið síðan síðasta sumar sem framleiðsla á evrusvæðinu eykst milli mánaða. Þessi tíðindi koma á sama tíma og væntingavísitala þýskra fjárfesta lækkar eins og Vísir greindi frá fyrr í dag. Financial Times greinir frá þessu í dag.

Sextán þjóðir eru aðilar að sameiginlegu myntbandalagi Evrópusambandsins.

Framleiðsluaukning milli mánaða í Þýskalandi sem og í Frakklandi og Ítalíu, hefur eflt von hagfræðinga um endurreisn efnahagslífsins í Evrópu. Minnkandi framleiðsla á Spáni og í smærri þjóðum Evrópusambandsins draga hins vegar úr vonum hagfræðinganna.

Framleiðsluaukningin á evrusvæðinu í heild sinni er þó örlítið minni en vonir stóðu til þrátt fyrir jákvæðar fréttir af framleiðslu einstakra ríkja.

Þýskaland er stærsta hagkerfi Evrópu og því skiptir miklu máli fyrir evrusvæðið að Þýska hagkerfið nái að rétta úr kútnum sem allra fyrst.