Forseti Íslands sannfærði stjórnendur Singer & Friedlander

Kaupþing yfirtók Singer & Friedlander bankannn árið 2005 eftir að Ólafur Ragnar Grímsson, forseti Íslands, hafði ári áður haldið bankaráðsformanni og forstjóra Singer & Friedlander hádegisverðarboð með stjórnendum Kaupþings, að beiðni Sigurðar Einarssonar, stjórnarformanns Kaupþings. Þetta kemur fram í Sögu af forseta, sem skrifuð er af Guðjóni Friðrikssyni sagnfræðingi.

Tony Shearer var forstjóri Singer & Friedlander þegar Kaupþing yfirtók bankann árið 2005. Hann hefur verið afar gagnrýninn á yfirtökuna eftir að Singer & Friedlander var settur í greiðslustöðvun í október síðastliðnum. Hann bar vitni fyrir breskri þingnefnd í febrúar síðastliðnum. Þá sagðist hann hafa varað breska fjármálaeftirlitið við því að leyfa yfirtökuna fjórum mánuðum áður en af henni varð því stjórnendur Kaupþings væru ekki hæfir til að reka banka í Bretlandi. Í síðustu viku ítrekaði hann svo gagnrýni sína á breska fjármálaeftirlitið.

Af lýsingu Guðjóns að dæma var Shearer hins vegar samþykkur viðskiptunum. Hann segir að Kaupþingsmenn hafi snúið sér til Ólafs Ragnars til að sýna fram á að þeir hefðu trúnað og traust á Íslandi. Vorið 2004 hafi svo þeir Paul Selway-Swift bankaráðsformaður og Shearer komið til Íslands. Að beiðni Sigurðar Einarssonar og þeirra Kaupþingsmanna hafi forseti Íslands boðið þeim til langs hádegisverðar á Bessastöðum ásamt Kaupþingsmönnum. Þar hafi Ólafur Ragnar haldið fram ágæti Kaupþingsmanna og tíundað hvers vegna Bretarnir ættu að ganga til viðræðna við Íslendinga.

„Þeir Selway-Swift og Shearer munu við svo búið hafa látið sannfærast um að óhætt væri að hefja viðræður við Kaupþingsmenn og mun hádegisverðurinn á Bessastöðum hafa skipt verulegu máli. Í nóvember 2005 stóð KB banki fyrir hófi í Þjóðmenningarhúsinu í tilefni af kaupum sínum á Singer & Friedlander. Þar voru viðstaddir Tony Shearer, fráfarandi bankastjóri, og Ólafur Ragnar Grímsson. Í hófinu þakkaði Sigurður Einarsson forseta Íslands sérstaklega fyrir þátt hans í því að af kaupunum varð," segir Guðjón í bókinni.