Owen ósáttur við bekkjarsetu

Michael Owen segist hafa verið heill heilsu í tvær vikur en hann hefur ekki verið í byrjunarliði Newcastle í undanförnum leikjum.

Þetta sagði hann í grein sem hann skrifaði í leikskrá fyrir leik Newcastle gegn Wigan um helgina. Leiknum lauk með 2-2 jafntefli.

„Ég hef komið inn á sem varamaður í síðustu leikjum. Stjórinn hefur kosið að koma mér hægt og rólega aftur af stað. Hins vegar voru meiðsin ekki alvarleg og ég hef verið heill í tvær vikur," skrifaði Owen.

Joe Kinnear varði ákvörðun sína í samtali við fjölmiðla eftir leikinn. „Ég tel að hann sé um 80 prósent heill heilsu," sagði Kinnear. „Það er nauðsynlegt að koma honum rólega af stað. Við vitum vel hvað Michael er fær um að gera en það var enginn að velta þessu fyrir sér eftir sigurinn á Aston Villa."

„Michael Owen er besti leikmaðurinn hjá þessu félagi. Við verðum að taka réttar ákvarðanir og það er ljóst að mér er það ómögulegt að taka réttar ákvarðanir."

Stuðningsmenn Newcastle bauluðu þegar að Kinnear tók Jonas Gutierrez af velli fyrir Owen um helgina. „Það er erfitt að þurfa að taka ákvarðanir. Það er sama hvað ég geri, það er aldrei rétt ákvörðun."