Vildi Gerrard bara hlusta á Phil Collins?

Enskir fjölmiðlar eru stútfullir af sögum um hvað gerðist á skemmtistaðnum þar sem Steven Gerrard var handtekinn á sunnudagskvöldið.

Það hefur nú fengist staðfest að Gerrard hefur verið kærður fyrir líkamsárás ásamt tveimur öðrum og þarf hann að koma fyrir dómstóla í næsta mánuði vegna þessa. Honum var sleppt úr haldi nú í nótt.

Það er vitað að plötusnúður skemmistaðarins, The Lounge Inn, var færður á sjúkrahús eftir að hann hlaut áverka í andliti. Talið er að hann hafi hlotið skurð á enni og misst tönn en einn þremenninganna braut flösku á höfði hans.

„Þetta tók ekki nema tíu sekúndur. Það varð allt vitlaust og staðurinn tæmdist á nokkrum sekúndum," sagði eitt vitni í samtali við enska fjölmiðla.

Fórnarlambinu, Marcus McGee, hafði verið ætlað að sjá um tónlistina á staðnum um kvöldið. Hann er 34 ára gamall tveggja barna faðir og góður vinur eiganda staðarins.

Vitni halda því fram að fyrr um kvöldið hafi einhver orðaskipti átt sér stað á milli McGee og vina Gerrard. Það hafi svo soðið upp úr þegar að Gerrard sjálfur bað um að fá að stjórna tónlistinni en McGee varð ekki við þeirri bón.

Enskir fjölmiðlar segja að tónlistarmaðurinn Phil Collins sé í miklu uppáhaldi hjá Gerrard, sem og Coldplay.

Verði Gerrard fundinn sekur um grófa líkamsárás gæti hann átt yfir höfði sér fimm ára vist í fangelsi sem verður þó að teljast afar ólíklegt.

Einn viðmælandi ensku fjölmiðlanna segir að dóttir sín hafi verið á sama stað og Gerrard þetta sama kvöld að halda upp á 35 ára afmæli sitt.

„Gerrard virtist vera í mjög góðu skapi og alls ekki drukkinn," sagði faðirinn. „Þegar hann fékk að vita að dóttir mín ætti afmæli keypti hann kampavínsflösku handa henni."