Lán Rússa til Íslands gæti markað breytingar á efnahagskerfi heimsins

Fjallað er ítarlega um hugsanlegt lán rússneskra stjórnvalda til Íslands á fréttavef Bloomberg í dag. Þar kemur fram að hér geti verið á ferðinni breytingar á efnhagskerfi heimsins þar sem Rússland skipis stærri sess.

Bent er á að hið fjögurra milljarða evra lán Rússa til Íslands sé fyrsta fjárhagslega aðstoð Rússa til NATO-þjóðar. Haft er sérfræðingi hjá fjármálafyrirtæki í Moskvu að þetta sýni styrk rússneska hagkerfisins. Rússar eigi gríðarlegan gjaldeyrisvaraforða, 563 milljónir dollara sem er jafnvirði um 62 þúsund milljarða króna. Slíkt geri Vladímír Pútín kleift að takast á við Bandaríkin á hinum alþjóðlega fjármálamarkaði en Bandaríkin horfi nú fram á mestu fjármálakreppu í landinu frá kreppunni miklu á þriðja áratug síðustu aldar.

Ísland að breytast í Kúbu norðursins?

Haft er eftir Davíð Oddssyni seðlabankastjóra að aðstoð Rússa muni miklu skipta. „Við höfum ekki fengið mikla hjálp frá góðum vinum okkar á vesturhveli jarðar. Ákvörðun rússneskra stjórnvalda að taka upp viðræður við okkur er vel þegin," segir Davíð.

Þá ræðir Bloomberg við Íslending, Ragnar Hannes Guðmundsson, sem segir Ísland vera að breytast í Kúbu norðursins. „Sovétríkin aðstoðuðu Kúbu fyrir nokkrum áratugum og nú ætla þau að bjarga okkur," segir Ragnar.

Reyna að bæta samskiptin við Vesturlönd

Bent er á að í Rússlandi finni menn þó vel fyrir alþjóðakreppunni því Rússar reiði sig mikið á útflutning olíu og gass en olíuverð hafi lækkað mikið að undanförnu eftir að hafa verið í methæðum í sumar. Þá hafi þurft að loka rússnesku kauphöllinni ítrekað vegna mikilla sveiflna á verði hlutabréfa.

Ef Rússar standi þetta af sér geti þeir sýnt efnahagslegan styrk sinn í alþjóðlegu efnahagslífi og minnkandi áhrif Bandaríkjanna, segir Sergei Markov, þingmaður Sameinaðs Rússlands, flokks Pútíns. Undir þetta tekur Larry Summers, fyrrverandi fjármálaráðherra Bandaríkjanna, sem segir lán Rússa til Íslendinga endurspegla minnkandi hlutverk Bandaríkjanna á alþjóðamarkaði.

Þá segir umræddur Markov að með því að lána Íslandi fé aukist áhrif Rússlands og sömuleiðis vilji þeir með því reyna að bæta samskiptin við Vesturlönd vegna deilunnar um Georgíu.