Wenger vill halda Gallas

Arsene Wenger, stjóri Arsenal, segist vilja halda William Gallas hjá félaginu þrátt fyrir allt sem komið hefur fram í fjölmiðlum að undanförnu.

Enska götublaðið The Sun hafði eftir vinum Gallas í dag að hann vildi ólmur komast frá Arsenal og þá helst til Ítalíu.

Wenger ákvað á dögunum að taka fyrirliðabandið af Gallas eftir umdeilt viðtal þar sem hann lét eftir sér hafa að leikmenn Arsenal væru huglausir.

Wenger sagði að hann vildi Gallas hjá félaginu þrátt fyrir allt.

„Vandamálið við umhverfið sem við búum við í knattspyrnunni er að það er sífellt verið að reyna að skapa óstöðugleika hjá okkur með því sem er haldið fram í fjölmiðlum."

„Ég get lítið gert í því. Ég get aðeins sagt frá því sem við hjá félaginu viljum gera. Við viljum halda Gallas því hann er mikilvægur leikmaður. Við getum ekki stjórnað því hvað kemur fram í fjölmiðlum."