Staða banka vestra betri en óttast var

Hlutabréf í fjármálafyrirtækjum í Bandaríkjunum hafa hækkað mikið í kauphöllum vestanhafs í kjölfar árshlutauppgjöra sem eru betri en búist var við. Verð hlutabréfa í fjármálastofnunum og bönkum byrjaði að hríðfalla fyrir hálfum mánuði, en þá fréttist að ríkið kynni að þurfa að koma fasteignalánasjóðunum Fannie Mae og Freddie Mac til bjargar. Gjaldþrot IndyMac-bankans 14. þessa mánaðar kynti enn frekar undir áhyggjur fjárfesta. Slæmt uppgjör U.S. Bancorp á þriðjudaginn jók enn á áhyggjur fjárfesta.

Verðfallið náði hámarki á þriðjudaginn, en þá kynnti Bandaríska fjármálaeftirlitið (SEC) nýjar reglur sem takmörkuðu skortsölu í nítján stórum bönkum og fjármálafyrirtækjum, þar á meðal Fannie Mae, Freddie Mac, JP Morgan, Bank of America og Citigroup, en talið er að skortsalar hafi staðið að baki verðfalli síðustu vikna. Reglurnar tóku gildi á mánudaginn og munu líklega gilda í mánuð. Það vakti athygli að Wachovia, fjórði stærsti banki Bandaríkjanna, var ekki á listanum.

Wachovia hafði leitt verðfall bankafyrirtækja undanfarnar vikur, en fréttir hafa borist af því að alríkislögreglan og yfirvöld í Michigan-ríki séu að rannsaka undirmálslánadeild bankans.

Á miðvikudag birti Wells Fargo árshlutauppgjör sem sýndi að tap bankans á fasteignabréfum var umtalsvert minna en greiningardeildir höfðu spáð fyrir, en bankinn er áberandi í fasteignalánum í Miðvesturríkjum Bandaríkjanna. Í kjölfarið tóku hlutabréf fjármálafyrirtækja að stíga í verði. Á fimmtudag og föstudag birtu J.P. Morgan Chase og Citigroup sömuleiðis árshlutauppgjör sem sýndu mun betri afkomu en spáð hafði verið. Árshlutauppgjör Bank of America, sem fjallað var um í Fréttablaðinu á þriðjudag, var einnig betra en gert hafði verið ráð fyrir.

Níu milljarða dollara tap Wachovia, sem birti árshlutauppgjör í gær, var hins vegar meira en greiningardeildir gerðu ráð fyrir. Þegar blaðið fór í prentun hafði árshlutauppgjör Washington Mutual ekki verið birt. Bréf félagsins féllu lítillega í utanþingsviðskiptum.

Í lok viðskipta á mánudag höfðu bréf í Bank of America hækkað um 54 prósent frá því á þriðjudaginn í síðustu viku. Fjármálavísitala Kauphallar New York, NYK.ID, hefur hækkað um 16 prósent frá því botninum var náð á þriðjudeginum fyrir viku.- msh