Dollarinn gæti hrunið í kjölfar björgunaraðgerðanna

Björgunaraðgerðir Bandaríkjastjórnar til að létta á fjármálakreppunni þar í landi gætu leitt til þess að gengi dollarans hrynji á næstunni.

Að sögn Bloomberg fréttaveitunnar eru fjárfestar nú að meta kostnaðinn við björgunaraðgerðirnar og þau áhirf sem þær kunna að hafa á dollarann.

Sambland þess að nota 700 milljarða dollara til að greiða fyrir undirmálslán og önnur ónýt lán ásamt 400 milljarða dollara innspýtingu í fjármálafyrirtækin vestanhafs munu auka lántökur Bandaríkjamanna verulega.

"Hin hliðin á þessu máli er að dollarinn mun hrynja," segir John Taylor stjórnarformaður IFEC í New York en það er stærsti vogunarsjóður í heimi og stýrir um 15 milljörðum dollara.

Dollarinn féll gagnvart 14 öðrum gjaldmiðlum á föstudaginn um leið og fjármálaráðherra Bandaríkjanna tilkynnti björgunaraðgerðirnar.

Hér heima er athylgisvert í þessu samhengi að sjá að krónan styrkist mest í morgun gagnvart dollar miðað við aðrar myntir. Dollarinn hefur falluið um 1,8% gagnvart krónunni en til samanburðar hefur evran fallið um rúmt 0,5%.

"Hin neikvæðu áhrif á dollarann vegna þessa skells sem efnahagsbókhald bandarísku stjórnarinnar verður fyrir gera það að verkum að lausnin á bankakreppunni verður eins og dropi í hafið í samanburðinum," segir David Woo forstjóri gjaldmiðladeildar Barclay´s.