Sádar vilja funda vegna olíuverðshækkana

Yfirvöld í Sádi-Arabíu hafa ákveðið að efna til fundar meðal olíuframleiðsluríkja og olíukaupenda og seljenda til þess að ræða leiðir til þess að takast á við hækkandi olíuverð.

Frá þessu greindi upplýsingaráðherra landsins eftir ríkisstjórnarfund í gær. Þá ætla Sádar að vinna með OPEC-olíuframleiðsluríkjunum að því að tryggja nægar olíubirgðir í heiminum nú og einnig í framtíðinni. Eftir því sem segir á fréttavef CNN vilja Sádar með þessu vinna að stöðugleika á olíumarkaði en Sádi-Arabía mun vera eina olíuframleiðsluríkið sem aukið getur framleiðslu sína svo nokkru nemi. Upplýsingaráðherra Sádi-Arabíu sagði enn fremur að ekkert réttlætti hinar miklu hækkanir á olíuverði að undanförnu.

Hvert olíuverðsmetið hefur verið sett á fætur öðru undanfarna daga. Kostar olíutunnan nú um 139 dollara og bensínverð hér á landi er komið í yfir 170 krónur á lítrann og díselolíverð yfir 190 krónur.