Beckham vill spila á HM 2010

David Beckham, fyrrum landsliðsfyrirliði Englands, vill spila með liðinu á HM 2010 sem fer fram í Suður-Afríku. Hann verður þá 35 ára gamall.

Beckham er á mála hjá bandaríska MLS-liðinu LA Galaxy en verður lánaður til AC Milan í næsta mánuði fram á vorið. Hann ákvað að fara til Ítalíu til að halda sér í formi og freista þess að vinna sér sæti í enska landsliðinu á ný.

„Það er mér mikilvægt að spila vel í hverjum leik og halda mér í góðu formi," sagði Beckham í viðtali við Sky Sports. „Það er ein ástæðan fyrir því að ég ætla að fara til AC Milan í nokkra mánuði."

„Ég hef nú fengið tækifæri til að spila með einu stærsta félagsliði heims en það jafnast ekkert á við að spila fyrir hönd þjóðar þinnar."

„Ég myndi gjarnan vilja spila áfram með landsliðinu en ég verð bara að fá að taka einn leik fyrir í einu. Ef ég næ að vera með á HM yrði það frábært. Ég hef notið þess að spila í undankeppninni og sjá hversu vel liðið hefur náð saman."

Beckham telur að enska landsliðið eigi góðan möguleika á að komast á HM enda er liðið búið að vinna alla fjóra leiki sína til þessa í undankeppninni.