Redknapp afskrifar titilvonir Arsenal

Harry Redknapp á ekki von á öðru en að Chelsea og Manchester United munu berjast um Englandsmeistaratitilinn í ár.

Arsenal gerði 1-1 jafntefli við Tottenham um helgina en Redknapp á ekki von á að liðið muni gera atlögu að titlinum upp úr þessu. Þá segir hann Liverpool stóla of mikið á Steven Gerrard og Fernando Torres.

„Annað hvort Chelsea eða Manchester United verður meistari," sagði Redknapp. „Liverpool er í toppbaráttunni líka sem stendur en liðið er of háð Gerrard og Torres. Ég veit ekki hvað Liverpool myndi gera ef Gerrard myndi meiðast."

Arsenal er nú í fimmta sæti ensku úrvalsdeildarinnar, átta stigum á eftir Liverpool sem gerði einnig jafntefli um helgina, rétt eins og Chelsea og Manchester United í sínum leikjum.