Forstjóra Bang & Olufsen sparkað

Stjórn danska raftækjaframleiðandans Bang & Olufsen rak í dag Torben Sörensen, forstjóra fyrirtækisins. Fyrirtækið birti í gær slakt uppgjör sem olli því að fjárfestar losuðu sig við bréf í félaginu með þeim afleiðingum að markaðsvirðið féll um rúm 29 prósent.

Að því er fram kemur í uppgjöri fyrirtækisins dróst sala heldur saman á síðasta ári, þar af um heil tólf prósent í Bretlandi og tvö prósent í Bandaríkjunum á síðasta fjórðungi nýliðins árs. Útlit er fyrir erfitt ár, samkvæmt uppgjörinu.

Rekstrarhagnaður raftækjaframleiðandans nam 49,3 milljónum danskra króna, jafnvirði rúmum 612 milljónum íslenskra, á síðasta ársfjórðungi, sem er annar ársfjórðungur í bókum félagsins. Þetta er 61 prósents samdráttur á milli ára. Fyrirtækið gerir sömuleiðis ráð fyrir að rekstrarhagnaðurinn á yfirstandandi ári muni nema 360 milljónum danskra króna, sem er 164 milljónum krónum minni en árið á undan.

Uppgjörið fór afar illa í fjárfesta og féll gengið bréfa í Bang & Olufsen í söluhrinu. Gengi' hefur haldið áfram að falla á hlutabréfamarkaði í Kaupmannahöfn í dag og nemur lækkunin það sem af er dags tæpum sex prósentum.

Stjórnin sendi frá sér tilkynningu í dag þar sem fram kemur að forstjóraleit sé þegar hafi en vonast sé til að hann finnist utan veggja fyrirtækisins.