Einn mánuður enn hjá Kinnear

Joe Kinnear hefur framlengt samning sinn við Newcastle um að stýra liðinu áfram næsta mánuðinn.

Kinnear tók við liðinu eftir að Kevin Keegan hætti í september síðastliðnum og hefur síðan samið við Newcastle um einn mánuð í einu.

„Samkomulagið var að ég myndi vera við stjórnvölinn þar til félagið yrði selt og það er ekkert nýtt að frétta af því máli," sagði Kinnear en Newcastle gerði í dag markalaust jafntefli við Chelsea á útivelli.

„En ég fékk að vita að ég yrði áfram næsta mánuðinn sem þýðir að ég verð hér þegar að félagaskiptaglugginn fer að opna. Ef ég get snúið upp á einhverja handleggi gæti ég keypt einhverja leikmenn."