Sátt að nást um fjármálafrumvarp

Leiðtogar demókrata og repúblíkana á Bandaríkjaþingi greindu frá því í morgun að búið væri að semja í meginatriðum um áætlun um björgun fjármálafyrirtækja í Bandaríkjunum. Demókratinn Nancy Pelosi, forseti fulltrúadeildar Bandaríkjaþings, sagði að málinu hefði miðað vel áfram en enn væri eftir að ganga frá nokkrum lausum endum.

Verið er að semja um stofnun sjö hundruð milljarða dala sjóðs sem nota á til að kaupa undirmálslán af illa stæðum bönkum og fjármálafyrirtækjum í Bandaríkjunum.

Talið er að frumvarp verði tilbúið síðar í dag og jafnvel strax greidd atkvæði um það í fulltrúadeild Bandaríkjaþings. Fjármálasérfræðingar og ráðamenn í Washington hafa lagt áherslu á að málið verði komið í höfn áður en opnað verði fyrir viðskipti á mörkuðum á morgun.