Býst við að bensínverð hríðfalli í nánustu framtíð

Olaf Haahr, sem eitt sinn var nefndur bensínkóngurinn í Danmörku, býst við að olíuverð hríðfalli á næstunni, eða um leið og fjárfestar og spákaupmenn missi áhugann á olíunni.

Í samtali við business.dk, viðskiptablað Berlingske Tidende, segir Haahr að olíubóla sé á markaði núna og að gríðarlegar verðhækkanir megi rekja til spákaupmennsku vogunarsjóða og alþjóðlegra banka en ekki til eftirspurnar. Bólan springi um leið og þeir missi áhugann á olíunni sem fjárfestingarkosti og þá geti verð á eldsneyti lækkað um allt að helming.

Haahr bendir á að 86 milljónir tunna af hráolíu séu framleiddar á dag en höndlað sé með 3,3 milljarða tunna á pappírum. Slík viðskipti ýti verðinu upp.

Haahr hefur starfað í olíubransanum í nærri hálfa öld og vakið athygli á áttunda áratug síðustu aldar þegar hann lýsti yfir stríði á danska bensínmarkaðnum með fyrirtæki sínu Haahr Benzin. Hann efnaðist á því en seldi á endanum félagið til Statoil. Hann hefur hins vegar stofnað nýtt félag og hyggst opna 50 bensínstöðvar í Danmörku á næstu tveimur árum.