Ferguson hræðist ekki kaupmátt City

Alex Ferguson óttast ekki að Manchester United verði á næstunni „litla" félagið í Manchester í ljósi þess að nýir eigendur City eru moldríkir.

Þessi lið mætast í deildinni um helgina og Ferguson gat ekki stillt sig um að senda grönnum sínum nokkrar pillur.

„Hvar er City í töflunni núna?" spurði Ferguson. „Okkur stendur fyrst og fremst ógn af Chelsea og Liverpool sem eru fyrir ofan okkur í töflunni."

„Peningarnir eru framtíðarmál. Mark Hughes þarf að ákveða hvernig hann ætlar að móta sitt lið."

Ef City mun takast að styrkja lið sitt verulega á næstu árum óttast Ferguson ekki að takast á við þá áskorun.

„United er vel í stakk búið til að mæta áskorunum. Við þurfum að bregðast við breyttum aðstæðum hjá Chelsea á sínum tíma og sem betur fer höfum við sigrað í deildinni tvö ár í röð."